Entrante promé di yanüari 2014 a remplasá Grondbelasting na Kòrsou pa Onroerendezaakbelasting (OZB). Na mei 2013 Staten a aprobá e lei aki.

Riba e site aki bo por lesa:

• kiko Onroerendezaakbelasting (OZB) ta presis
• ki konsekuensha e impuesto aki tin pa bo
• kiko e tarifanan ta
• kon e taksashon i stipulashon di e balor ta funshoná
• kon ta prosesá e impuesto pa kobransa (aanslag)
• kon ta kobra e impuesto
• ki posibilidatnan tin pa apelashon

Pa konkluí tin informashon den forma di algun video kòrtiku i un foyeto digital, kaminda bo por haña kontesta riba bo preguntanan relashoná ku OZB. Komo Inspekshon di Belasting nos ke sirbibu mas mihó posibel.

No mashá kos. A modernisá e idioma i e konseptonan den e lei, e balor basá riba taksashon awor a bira e konsepto mas kla “E balor den transakshon ekonómiko”, a introdusí un tarifa di trapi i a subi e impuesto.

Mas kos ku ta nobo ta ku den kaso di un edifisio riba un tereno di hür ku ta propiedat di pais Kòrsou e hürdó di e tereno mester paga impuesto riba balor di e edifisio. A oumentá e kantidat di eksonerashon di OZB ku prinsipalmente tereno den naturalesa ku ta habrí pa públiko despues di aprobashon di minister, i tereno di deporte i fasilidat di deporte di gobièrnu òf fundashon sin meta di lukro i ku no ta hasi ganashi tampoko. Mester paga un aanslag definitivo di OZB denter di dos luna despues di su fecha. Eksonerashon di impuesto (P.e. pa motibu di hopi tempu pará sin uso) ya no ta posibel.